Lüchow. Dat erste Stück, dat de plattdütsch Theoter spölt hat, wer ,,De kloke Heini“. Dat wär 1976. Wi harn Ferien un wärn in Tepling as dat upföhrt warn schüll. Nu spöler Wilfried ut uns Dörp, de klok Heini un dorum wollern wi uns dat ok ankieken. Wi wärn ein ganz Corono. De Sool in Schreyan wer all meist vull as wi henkämen. Un denn wär dat ok all sowiet. Herwald Schulze, ick heff em denn noch nich kennt, wöler sick dörch de Vorhäng un at upp platt de Tokiekers begrüßt. He verteller wat öber de Stück un steller de Spölers un ehr Rullen vör un denn ,,güng dat Läben los“. So as he dat mokt hat, wär dat all spoßig. Un spoßig wär ok dat ganze Stück. Wi hemm völ lacht. As dat vörbi wär, wollern wi an Thek noch ein Beer drinken. Wi stünden dor also un hem uns noch wat vertellt, dor käm Herwald up einmol un steller sick dorbi. Denn frög he mi, wu mi denn dat Stück gefallt har. ,,God“, heff ick seggt ,,dat wer ja drullig un se hem dat fein mokt “. Off ick denn allens verstohn har, woll he denn weten. ,,Jo, ick verstoh platt“ heff ick em ännert. Denn woll he mi ein Likör utgeben ,dorto heff ick ok nich nä sächt. Nu schüll ick ober woll noch mehr öber de Stück vertellen ober ick wüss ok nich mehr so recht wat. Na denn toletzt lang noch, klopper he mi up Schullern uns säh: ,,Na, denn schrieben Se man ok wat Schönes.“ Ick heff em woll grot ankeken denn ick wüsser nich wu ick wat schrieben schüll. Dor marker he ok dat wat nich stimmt uns seggt: „Oh güt, dat sünd Se ja gornich, ick heff rekt Se wärn von Zeitung. De hat ok ümmer sön oll Schnor um.“ Dorbi zeiger he up de Schullerreem von mien Tasch un hat dat för ein Fotoapparot hold. In Zeitung stünn denn por Dog löter doch ein schön Artikel von de Stück, sogor mit Bild. Herwald mütt de richtich Fru von Zeitung doch noch funnen hemm. Un nu, sovöl Johrn löter, heff ick ok noch wat för Zeitung schreben. ↔Elke Laufs
