Lüchow. Letzt heff ick nohfrogt off wi, also mien Kerl un ick mit uns Enkeldeern mol in de Serengeti-Park Hodenhagen föhrn könn. Jo, hem se seggt, man ümmer los. Ick bün neischierig off sick völ ännert hat in de letzt 25 Johrn. As uns Kinner lütt wern, sünd wi dreimol dor west un ümmer is wat upregent passeert. Wi sünd ümmer mit uns Auto dörchföhrt, man kann ok mit Bus mitföhrn, mütt man ober nich. Dat is so wunnerbor schön, de Giraffen, Nashörner, Zebras antokieken, du denkst du büst in Afrika up Safari. Denn kümmst in ein Gehege dor dörfst utstiegen un dat Lüttwild furrern, dat mökt de Kinner Spoß. Dor in dat Gehege is ein Kerl ut Versehn bi ein anner Autoföhrer schegn sien Auto lopen, denn hat de Autoföhrer mit Fust ut de Autoschief de Kerl ein up Nees schlogn, hat Gas gevt un wech wer he un all annern hem verduzt keeken. Lühd gifft dat, de sünd glieks up 180! Dornoh föhrt man dörch dat Raubtiergehege, dor hast doch sönn beten mulmig Geföhl un denkst, lot bloß dat Auto hier nich stohn blieven. De Löwen mütten satt west hem, denn se hem all unner Boom legen un slopen. Dorno käm wi bi de Oopen un Nandus un noch anner Vecher in Gehege. Up dat Auto för uns, wärn mitmol Oopen togang de löpen vun vörn noh achtern un werrer trüch. Wär lustig antokieken, ein Oop hat sick an de recht Butenspägel hungen un aff wär de Spägel. Wi hem lacht, mitmol wär de ganz Oopenbande up uns Auto togang. Dor hem wi nich mehr lacht. Mien Kerl hah bang um sien Auto, dorum hat he mit de Schiebenwaschanlog de grot Oop, de in uns Auto glotzen dä, natt spritt. Dat hat em nich verjogt, he hat sick umdreiht un versöcht mit Mul dat Woter uptofangn. De Kinner hem sick ock doröber amüsiert, wär ok nüdlich. As mien Kerl uphörer em dat Woter in Mul to spritten, hat de Oop för Dullheit de Proppen von de Schiebenwaschanlog rutreten. Bevor de Oop runnersprung vun uns Auto, hat he bi uns up de Kühlerhaub ruppscheten. All hem erstmol igitt schreen. Wi dachern noch, wu warn wi dat bloß loß! Keen Problem, bevör wi in dat nächste Gehege rinföhrt sünd, käm ein Nandu un hat dat Oopenschiet upfrettten un all hem werrer igitt schreen. Uns Jungs hem sick köstlich amüseert. Ju Annedore Woltersdorf
