lk Lüchow. Fasching in mien Kinnertied, tja, dat is, wu schall ick segn, för mien Öllern nich wichtig west. Denn in de Grungschol müsser ick ümmer mit dat sülbig Kostüm los. Wat heit Kostüm, dat wär ein Hot mit ein lütt Blom an. Un denn hem se mi ein lütt Geitkann Hand drückt – un schon wär ick ein Gärtnerin. Boooh, heff ick dat hasst! Ick woll ein Indionerin orer Cowboy wäsen ober näh, dat wärn ahl de annern. Ein von de Kinner säh se wär ein Hippi. Tja, ick wüss nich, wat ein Hippi wär, ober ümmerhen beder as ein Gärtnerin.
Tweemol wär ick sogor mit mien Cusine mit no Schnega. Man, ick kann ju seggn, dor güng de Post aff. De Kinner harn ahl so fein Kostüms an, de wärn Scheich, Prinzessin, Buktänzerin, Astronaut un wer weit nich wat noch allens. Un ick: Gärtnerin, man, sönn Schiet, ober okay.
Ober denn käm mien Tied, as sick no Lüchow no Schol käm. Tätätätätätä! Ick wär Wendländerin. Kosak, Chines un Hippi … Jipppi! Un dat wär dat denn ok, denn aff de achte Klass wär dat denn to schanierlich. Ober 2022 in Febuar kort vör Corona, dor wär ick in Kläden to Karneval as Hex. De hem dor wat up de Bein bröcht, dor treck ick mien Hot vör. Dat at mi Spoß mokt, ick segg bloß „Imi Ata“. Dat heit sovöl as „Helau“, wat de Jecken in Rheinland ropen. Imi un Ata is Schüerpulver, dorför hat de Firma Henkel in ein Sandkuhl bi Kläden Sand afbuht un dorum de Gruß „Imi Ata“! Ick fun dat genial, dor müt mann man erst mol up komen. Vööln Dank, Christoph, dat du mi mitnohm hast.
PS: Off ji dat glöben orer nich, de grön Hot mit de Blom gifft dat ümmer noch.
Annedore Woltersdorf
