lk Lüchow. Tja Lüd, vör por Dag heff ick läst, dat de Konzern ,,Weck“ Insolvenz anmeldt hat. Dat kann man sick gornich vörstelln, dat so een grot Firma, de över 120 Johr besteit, upgifft. Unsereeins is dormit grot wörn. Wat hat mien Mudder nich all´s inkokt. Dat füng in Fröhjohr an un hörer in Havst up, un so har man de ganz Winter wat dorvun. Un ick heff dat noher ok so mokt. Nich mehr so vööl, weil man ja de Gefrierschapp hat. Ober wer will hüttodags noch in Gorden Afen, Wörteln un Co. anbuen, dat sünd de wenigsten, un ick tell mi ok dorto. Bi mi sünd nu Hochbeete praktisch, dor kümmt ok bloß dat Nötigste rin.
Ower wat ick eigentlich vertellen will, is een Geschicht vun mien Kerl, as hei noch lütt wär. Hei günn in Plot in de Grundschool, un morgens hat de Nohbohrsdeern em ümmer afholt. Nu har sien Mudder ut Keller de inkokt Leberworstglös, de schlecht wärn, rutholt un up Hoff henstellt. Un as keener to sehn wär, hem de beiden mit Steener up de Glöss schmeten. As se dropen hem, sünd de Glöss explodiert. De schlecht Leberworst is de beiden um de Ohrn flogen. De wärn von boben bet unnen vull Leberwors tun stunken hem sei ok. Dat al‘s vör School, prost Mohltied!
Lot ju dat gotgohn, un wenn ji een Leberworststull äten, denkt an de Geschicht, ju Annedore Woltersdorf.
PS: Un wenn ji een beten mehr inkoken wörd bruker ,,Weck“ nich Pleite moken!
Wenn ok du, leevste Leserinnen un Lesers, en plattdüütsche Geschicht an düsse Steed vertellen wullt, schik dien Geschicht geern an kie bitz@ejz.de oder geev se ehr bi de Elbe-Jeetzel-Zeitung in Lüchow af. Velen Dank seggt de Redaktschoon vun Kiebitz.