lk Lüchow. „Wenn Pingsten is, wenn Pingsten is, denn schlacht uns Voder een Bock. Denn danzt uns Mudder, denn danzt uns Mudder denn wackelt er de Rock.“ Dat at uns Voder ümmer to Pingst sungen, un hei wär vergnöcht. Denn nehm he sien Zieharmonika (hei nenner em Erika ,weil dat stünn dor up) un spöler ümmerto. Mien Voder künn wunnerbor spölen, alns ut Kopp, Noten kenner hei nich. In Musik har hei ümmer een fief weil hei nich so schön singen künner, ober Zieharmonika, dat wär sien Instrument. As hei konfirmiert wör, spöler hei för sien Gäst up un in de Moment käm de Lehrer vörbi, un stauner. Mit Mol säh de Lehrer to em: ,,Minsch Benno, acht Johr hast mi belogen, du büst ja doch musikolisch.“ Aber de fief ha hei doch in sien Tüchnis. Vööl Johr löter hat hei to Pingst upspölt un de öller Lüüd hem vör jerer Gäbel orer Pört Maibööm upstellt. Ahl sünd se denn rundgohn un hem erstmol een Schluck drunken. Dat wer ein Gaudi .Wi Kinner hem uns amüsert, wenn se nich mehr grohut gohn künnern. Obends wör ock noch fieert un danzt. De Tieden sünd nu vörbi, allens hat sien Tied. Letzt, un ok dütt Johr hat mie Schwiegersöhn an Melkbank in Lübeln een grot Maibohm upstellt mit bunt Bänner an. Dor hew ick mi sowat vun freit. Völen Dank dorför Christian. Ji glöben ja gornich wu oft de Lüüd dorför stohn un er Biller mokt hem.
Ick wünsch ju een schön Pingstfest, blieft gesund un bet annermol,
ju Annedore Woltersdorf.
PS: Un wer an Pingstsönndag as letzt ut Bett kümmt, de is de Pingstoss.
Wenn ok du, leevste Leserinnen un Lesers, en plattdüütsche Geschicht an düsse Steed vertellen wullt, schik dien Geschicht geern an kiebitz@ejz.de oder geev se ehr bi de Elbe-Jeetzel-Zeitung in Lüchow af. Velen Dank seggt de Redaktschoon vun Kiebitz.