lk Lüchow. Vör poor Johr seten wie abends för Fernseher un hem uns „Wer wird Millionär“ mit Günter Jauch ankeken. Up einmol käm de Frog: Was ist ein Rundling? De veer Antworten weit ick nich mehr, ower de Kandidot hat dat nich rutkregen. Nu wer dat to de Tied so, dat wie mit ein lütt Grupp Schloger un plattdütsch Leeder up Fieern un Veranstaltungen sungen hem. So hem wie dacht: Wenn de Lüd nich weten, wat Rundlings sünd, denn könn wie ja mol ein Leed up Platt dorvon moken – un jem dat vörsingen. Un dütt hat dorbi rutkomen:
Kehrvers: Rundlinge, Rundlinge wat sünd denn dat, dicke Lüd, Hefeklüt, Tüffeln or wat?
Kumm doch int Wendland, dor kannst du jem finden: Se hem sick verstekt achter Eiken un Linden.
Eersten: Ein Rundlingsdörp at ein ganz eigene Ort, ein Hoff liggt an anner in Kreis as ein Tort.
No Melkbank in Middn wär ein Holperstrot buut, un so as du rinkümmst müsst du ok wer rut.
Rundlinge …
Tweeten: Wu old sünd de Hüser un wer at jem buut, dat kriegen de Archäologen arut.
Se meten un reken un grübeln un grobn, un Scharben un Knoken kom dorbi no bobn.
Rundlinge …
Drüdden: Up Dörpplatz dor könn all de Lüüd sick ok drepen un klönen un singen un drinken un eten.
Ut jeder Grot dör is dat allens to sehn, darum is dat Leben in Rundling so schön.
Rundlinge …
Jo, un nu is dat werrer sowiet, dat man sick up Dorpplatz drepen kann un dörf.
Vööl Sposs dorbi, ju Elke Laufs.
PS: Bi You Tube kann man sick dat ankiken.
Wenn ok du, leevste Leserinnen un Lesers, en plattdüütsche Geschicht an düsse Steed vertellen wullt, schik dien Geschicht geern an kiebitz@ejz.de oder geev se ehr bi de Elbe-Jeetzel-Zeitung in Lüchow af. Velen Dank seggt de Redaktschoon vun Kiebitz.